Margaretha Motschnigg

Hallo Oma! Gell, do schaust, olle Deine Schaferl san heit do des hättest bei Lebzeiten nimma gschofft! De 2. Reih, des woar Dei Plotz, gonz noch Deinem Motto: man soi si selber ned so wichtig nemma host ma vieles beigebrocht ob Halma, Mühle oder Schnopsen do woarst Meister Deines Faches! Des schummeln hob i ma söba beibrocht, wei des woar ned Deins. Des Schnitzel mocht ma mit Butterschmoiz dazua gibts Preiselbeeren und koa Ketchup mei, hob i ma docht, nimm i hoit beides, donn hots da passt. So monche Firma homma zum glänzen brocht des staubsaugen host ma richtig glernt, das ma a Teil a amoi auf d seitn stellt. Hob i bis dato a ned gwußt. Oba leida hob i des scho wieda vergessn, sogt mei Frau“ host imma ois gebn, und für jeden a offenes Ohr ghobt ob Verwandtschaft, Biblforscher oder Aboverkäufer, des woar da wurscht des Messingschüdl bei da Raika wa da fix! Tierlieb woarst jo a egal ob Hund, Wurm oder Hearna!jo richtig Hearna! Do gabs an Bauernhof im steirischen, dem san die Hearna obhonden kuma. Für de Oma koa Problem , neiche miaßn her! Hin zum Züchter, neiche bsorgt, einstweilen unterbrocht im Kabinett, geh leck, do hots ausgschaut!!! Tag der Auslieferung is kumma, der Kofferraum is pockt bis obenhin, man kummt jo net mit laare Händ, de Hearna am Rücksitz. Der Fahrer woar glei gfundn, da Karli, der hots gricht. Wei , es hot jo schnö ge miaßn. Gmiatlich über de Auto Bahn, damit sie si ned glei so verkrompft. De Streckn ab Tamsweg, de woar zu selektiv da Franzos hot donn zoagn miaßn , wos in eam steckt! So moncha Piefke hot dron glaubn miaßn wei, es hot jo schnell geh miaßn Richtung Predlitz de Bodenwelle hot er eana no zagt, wias obhebn geht. Zomt der Schochtl. Weil, es hot jo schnö ge miaßn!! Gott sei Donk woar koa Schandi auf da Stroßn! Mia hättns eh ned dabremst, wei es hot jo schnö geh miaßn!! ob de jemois Eier glegt hom, i glabs ned! Do am Engelboch, do hots da taugt, am Bacherl samma gsessn, de jungen Enterl schwimman vorbei, de Schrazerl springan ausn Wosser, a Födhos hot gschaut, wer is denn do? Immer an Blick auf ihren Flox, den sie uns brocht hot. Auf oamoi fongts zum grinsen on, schaut auffi zum Haus und sogt: mei, des wos i gebn hob zu Lebzeiten, so a Heisl hätt i ma locker kafft. Zwoa Herzensmenschen von Dir san a heit do, da Karli mit seiner Martina i glaub, de Nobeschnur bei Eich zwoa woar nie gonz durchtrennt. Heit sogat ma Blutooth! Bsundern Donk eich Zwoa, selbst übern Tod von da Oma hinaus woards oiwei für sie do! Der Vorhang is jetzt gfoin. Glott hätt i vergessn, die Kirchn und s`geistliche woar oiwei gonz Deins! Liebe Oma! Hob a guate Zeit do oben! Prost !!! mia vergessn Di nie!!!!!